Propozimi i BE-së për të vendosur tarifa përfundimtare mbi automjete elektrike të prodhuara në Kinë mori mbështetje nga vende anëtare, tha të premten Këshilli i Europës në një deklaratë.
Dhoma e Tregtisë e Kinës pranë Bashkimit Europian (CCCEU) shprehu zhgënjimin e thellë ndaj rezultatit të votimit dhe pakënaqësinë e fortë për përdorimin e masave tregtare proteksioniste nga BE.
“Ndërkohë, Dhoma vërejti se ekipet negociuese nga Kina dhe Bashkimi Europian mbeten aktivë në diskutime, për të gjetur një zgjidhje të qëndrueshme,” tha po atë ditë CCCEU në një deklaratë. Ajo i kërkoi Bashkimit Europian të trajtojë me kujdes masat përfundimtare, të vonojë zbatimin e tarifave dhe t’i japë përparësi zgjidhjes së tensioneve tregtare përmes konsultimeve dhe dialogut.
Me 12 vende anëtare që abstenuan, pesë që kundërshtuan dhe dhjetë që votuan pro, Bashkimi Europian tani është i autorizuar të vendosë tarifa të ashpra anti-subvencion për importet e automjete elektrike kineze për pesë vjet. Megjithatë, Komisioni deklaroi se do të vazhdojë negociatat me Kinën për të eksploruar zgjidhje alternative, në përputhje me rregullat e OBT-së, si edhe të zgjidhë subvencionet e identifikuara në hetimin e saj që janë të monitorueshme dhe të zbatueshme.
Ministria e Jashtme theksoi kundërshtimin e fortë të Kinës ndaj projekt – vendimit përfundimtar të BE-së, por pranoi gatishmërinë politike të Bashkimit Europian për të vazhduar negociatat. Ekipet teknike nga Kina dhe BE-ja do të rifillojnë bisedimet më 7 tetor.
Kina shpreson që Bashkimi Europian të kuptojë se vendosja e tarifave nuk do të zgjidhë problemin. Ndërkohë i kërkon BE-së të ndërmarrë veprime konkrete për të përmbushur angazhimet e saj politike, duke u kthyer në rrugën e duhur për zgjidhjen e mosmarrëveshjeve tregtare përmes konsultimeve, thuhet në deklaratën e Ministrisë së Tregtisë të Kinës. Ministria ritheksoi se Kina do të marrë të gjitha masat e nevojshme për të mbrojtur interesat e ndërmarrjeve të saj.
