Përzgjedhësi i Anglisë, Gareth Southgate thotë se forma e sulmuesit Marcus Rashford duhet të përmirësohet nëse dëshiron të fitojë vendin në skuadrën e “Tre Luanëve”.
Sulmuesi i Manchester United u la jashtë skuadrës për miqësoret kundër Bregut të Fildishtë dhe Zvicrës në këtë muaj, përcjellë lajmi.net.
Forma e Rashford ka rënë në “Old Trafford” këtë sezon dhe po mendon të largohet nga klubi i fëmijërisë për shkak të mungesës së kohës për të luajtur.
24-vjeçari ka qenë i rregullt nën drejtimin e Southgate, i cili tenton t’u qëndrojë besnik lojtarëve.
Por, Southgate thotë se Rashford nuk është qartësisht në gjendjen më të mirë dhe duhet të përmirësojë paraqitjet e tij për të rifituar vendin e tij.
“Ai është në të njëjtin pozicion si gjithë të tjerët. Pavarësisht nëse është brenda apo jashtë skuadrës (çdo lojtar) duhet të luajë mirë në fund të sezonit dhe sezonin e ardhshëm”.
‘Është një kohë e vështirë për të. Është e qartë se nuk është në më të mirën, por ka shumë kohë (përpara Kupës së Botës)”.
“Ne e dimë për Marcusin dhe e dimë se çfarë mund të na sjellë”, nënvizoi ai.
Ndërkohë, në listën e Anglisë nuk u ftua as sulmuesi tjetër i Man Unitedit, Jadon Sancho.
