Ministri i Transportit Aleksandar Nikolloski njoftoi se kur do të jetë në funksion i gjithë autostrada Kërçovë–Ohër
Segmenti më kompleks i autostradës Kërçovë–Ohër, nga Izvori deri në Vrbjan, pritet të vihet në përdorim në tetor, ndërsa e gjithë lidhja rrugore, sipas paralajmërimeve të Nikolloskit, duhet të jetë në funksion në tremujorin e parë të vitit 2027.
Zëvendëskryeministri dhe ministri i Transportit, Aleksandar Nikolloski, është i kënaqur me realizimin e autostradës Ohër–Kërçovë dhe pret që të përmbushet premtimi që i gjithë segmenti të vihet në funksion në tremujorin e parë të vitit 2027.
Sipas Nikolloskit, në shtator pritet të paralajmërohet edhe fillimi i ndërtimit të autostradës Kërçovë–Bukojçan, në gjatësi prej rreth 12 kilometrash, e cila duhet ta lidhë Qafën e Strazhës me autostradën Ohër–Strugë–Kërçovë.
– Sa i përket pjesës më të vështirë të autostradës Ohër–Kërçovë, nga Izvori deri në Vrbjan, dy galeri janë përfunduar plotësisht, e treta është realizuar në masën 70 për qind, ndërsa e katërta rreth 50 për qind. Në tunele po vendosen softuerë, sisteme sinjalizimi për monitorimin e trafikut dhe paralajmërim të hershëm për zjarre, sisteme të ventilimit, si dhe një qendër supermoderne të kontrollit – tha ministri.
Nikolloski pret që në tetor kjo pjesë më e vështirë e autostradës të vihet në funksion. Më pas do të mbetet të zgjidhet edhe pjesa te Botuni, ndërsa në tremujorin e parë të vitit 2027 autostrada pritet të jetë plotësisht funksionale.
– Por nuk ndalemi këtu. E dini se po ndërtohen rrugët Tetovë–Gostivar dhe Gostivar–Bukojçan. Pres lajme të mira nga BERZH-i dhe që në shtator të paralajmërojmë ndërtimin e një autostrade tjetër, Kërçovë–Bukojçan, në gjatësi prej rreth 12 kilometrash, e cila duhet ta lidhë Qafën e Strazhës me autostradën Ohër–Strugë–Kërçovë – theksoi Nikolloski.
Nikolloski i bëri këto deklarata duke iu përgjigjur pyetjeve të gazetarëve pas vizitës së punës në Komunën e Strugës dhe takimit me kryetarin e komunës, Mendi Qura.
Segmenti Izvor–Vrbjan është një nga pjesët më komplekse të autostradës Kërçovë–Ohër dhe në të po realizohen një sërë ndërhyrjesh inxhinierike, përfshirë galeri dhe objekte tunelesh. Paralajmërimet aktuale janë se ky segment duhet të vihet në qarkullim në shtator ose tetor, ndërsa vënia e plotë në funksion e autostradës pritet në tremujorin e parë të vitit 2027.
