Gazetari Furkan Saliu ka reaguar lidhur me rastin e ish-zëvendëskryeministrit Artan Grubi, i cili është vënë përballë drejtësisë, duke ngritur një sërë pikëpyetjesh mbi mënyrën se si trajtohen politikisht dhe mediatikisht rastet që përfshijnë politikanë shqiptarë dhe maqedonas.
Saliu thekson se, nëse flitet për Artan Grubin, çështja duhet të jetë në duart e drejtësisë dhe të vendoset mbi bazën e provave. Megjithatë, ai shpreh dyshimin se procesi mund të shndërrohet në një spektakël mediatik dhe politik, veçanërisht në një periudhë kur në vend po përfliten zgjedhje të parakohshme.
Në reagimin e tij, Saliu sjell në vëmendje rastet e ish-ministres së Brendshme Gordana Jankullovska dhe ish-drejtorit të Byrosë për Siguri Publike, Mitko Çavkov, duke pyetur nëse Artan Grubi do të ketë të njëjtën hapësirë publike dhe mediatike për të paraqitur versionin e tij të ngjarjeve, nëse procesi ndaj tij përfundon në mënyrë të ngjashme.
Pyetja kryesore e ngritur nga Saliu është nëse një politikan shqiptar, i cili dikur ka pasur një rol të rëndësishëm në ekzekutiv, mund të ketë të njëjtin trajtim publik dhe mediatik si politikanët maqedonas kur përballen me procese gjyqësore.
Sipas tij, në një shtet ku drejtësia funksionon në mënyrë të barabartë për të gjithë, përkatësia etnike apo politike nuk duhet të ketë asnjë ndikim. Institucionet duhet të bëjnë punën e tyre, ndërsa gjykata duhet të vendosë në bazë të provave dhe përgjegjësia, nëse ekziston, duhet të jetë individuale.
Saliu e lidh këtë debat edhe me raste të tjera që kanë shkaktuar reagime të mëdha në opinion, duke përmendur tragjedinë në Koçan dhe çështjen e spitalit modular.
Në fund, ai rikthen një pyetje që vazhdon të jetë pjesë e debatit publik në Maqedoninë e Veriut: A është drejtësia vërtet e njëjtë për të gjithë?
