Albin Kurti po vijon për të tretën ditë në Shqipëri fushatën në mbështetje të kandidatëve të Vetëvendosjes në zgjedhjet e 25 prillit. Pas Lezhës dhe Tiranës, Kurti ishte sot në Gjirokastër ku bëri thirrje për të votuar Kreshnik Merxhanin.
Kurti tha se 3 kandidatët për deputetë të LVV janë të pavarur dhe duhet të jenë në Kuvendin e Shqipërisë për t’u angazhuar për përparimin e vendit.
“Janë tre kandidatë të pavarur të zgjedhur nga populli të cilët ne i mbështesim: Kreshnik Merxhani në Gjirokastër, Boiken Abazi në Tiranë dhe Iljaz Shehu në Lezhë. Janë të pavarur dhe ne i duam për deputetë të Kuvendit të Shqipërisë që të përfaqësojnë qytetarët dhe të angazhohen për përparimin e të gjithëve, sepse Shqipëria ka nevojë për zhvillim që sjell ndryshim dhe për drejtësi që nuk lejon korrupsionin”, u shpreh kreu i LVV.
