Kryeministri Hristijan Mickoski ka akuzuar ish-qeverinë e LSDM-së dhe BDI-së se, me vendimet e saj, ka krijuar pengesa politike në procesin e integrimit evropian të Maqedonisë së Veriut.
Sipas tij, ndryshimet kushtetuese nuk do të ishin kusht për avancimin drejt BE-së nëse qeveria e kaluar nuk do të kishte pranuar marrëveshje të pafavorshme.
“Qëndrimi ynë është i qartë dhe i pandryshuar. Për shkak të politikave antishtetërore të qeverisë së kaluar, sot përballemi me një kusht politik, që janë ndryshimet kushtetuese”, deklaroi Mickoski.
Ai shprehu optimizëm se vitin e ardhshëm vendi do të marrë një raport më pozitiv nga Komisioni Evropian, pasi disa reforma të Qeverisë, veçanërisht në luftën kundër korrupsionit dhe sundimin e ligjit, nuk janë përfshirë në vlerësimin e sivjetmë.
Kryeministri theksoi se dialogu me Bullgarinë vazhdon, duke shpresuar në një zgjidhje që do t’i mundësonte Maqedonisë së Veriut të zhbllokojë negociatat me Bashkimin Evropian.
