Një studim i ri ka gjetur prova të birrës së orizit që daton rreth 10.000 vjet më parë në një vend kulturor në Kinë, duke zbuluar origjinën e përpunimit të orizit dhe fermentimit të hershëm të alkoolit të orizit në Azi, shkruan “Xinhua”.
Sipas studimit të botuar në “Proceedings of the National Academy of Sciences”, një revistë e Akademisë Kombëtare të Shkencave të SHBA-së, kultura e Shangshanit në rajonin e poshtëm Yangtze të Kinës së lashtë është thelbësore për të kuptuar origjinën e përpunimit të orizit dhe fermentimit të hershëm të alkoolit.
Studiuesit e Universitetit të Stanfordit, Akademisë Kineze të Shkencave dhe Institutit Provincial të Zhejiang të Relikteve Kulturore dhe Arkeologjisë përdorën metoda të ndryshme për të studiuar artefakte nga faza e hershme e zonës Shangshan në Kinë, që datojnë rreth 10.000 vjet më parë.
Duke analizuar mbetjet mikroskopike në enët e qeramikës, ata gjetën prova që sugjeronin se populli i Shangshanit jo vetëm që e përdorte orizin si ushqim bazë, por edhe si lëndë të parë për prodhimin e pijeve të fermentuara.
Sipas studimit, kjo shënon teknikën më të hershme të njohur të fermentimit të alkoolit në Azinë Lindore.
Studimi tregoi se këto pije alkoolike kanë luajtur një rol të rëndësishëm në ceremoni, ndoshta duke inkurajuar kultivimin e gjerë të orizit në Kinën e lashtë.
