Ronald Koeman pritet të rimarrë drejtimin e kombëtares së Holandës.
Ikona holandeze e futbollit, Ronald Koeman pritet t’i kthehet punës së trajnerit, pas dështimit që pati në ‘Camp Nou’ me skuadrën e Barcelonës.
‘De Telegraaf’ bëri të ditur se Koeman do të jetë pasuesi i Louis van Gaal në stolin e ‘Tulipanëve’, duke filluar nga viti 2023, transmeton lajmi.net.
Një gjë të tillë e konfirmoi edhe faqja zyrtare e kombëtares së Holandës në ‘Twitter’.
Van Gaal më herët gjatë kësaj jave zbuloi se është diagnostikuar me kancer në prostatë.
Koeman ishte në krye të stolit të Holandës para se të kalonte te Barcelona. Ai pritet të kthehet përsëri aty, pas aventurës jo të mirë me katalanët.
