Ka përfunduar periudha e votimit përmes postës për zgjedhjet lokale të 17 tetorit.
Kryeshefi i Sekretariatit të KQZ-së, Burim Ahmetaj, tha se kanë pranuar 5 mijë e 649 pako të supozuara me fletëvotime.
“5 mijë e 649 pako të supozuara me fletëvotime, pra të gjitha janë tërhequr nga postat zyrtare të KQZ-së”, tha ai.
Periudha e votimit përmes postës ka filluar më 15 shtator dhe zyrtarisht ka përfunduar më 15 tetor.
Komisioni Qendror i Zgjedhjeve, ka përpiluar listën me votuesve jashtë Kosovës, të cilët kanë arritur të regjistrohen suksesshëm për votim jashtë Kosovës dhe këta emra (15,532) i ka larguar nga lista votuese që shpërndahet në vendvotime, në ditën e zgjedhjeve më 17 tetor.
Numri i qytetarëve me të drejtë vote jashtë vendit, të cilët kanë arritur të regjistrohen suksesshëm si votues jashtë Kosovës është: 15 mijë e 532 votues. Periudha e aplikimit për t’u regjistruar si votues jashtë Kosovës kishte filluar më 10 korrik dhe është përmbyllur më 18 gusht 2021.
Fletëvotimet duhet të pranohen nga KQZ-ja më së largu deri më 15 tetor.
Zgjedhjet lokale do të mbahen ditën e diel, më 17 tetor.
