Zelensky viziton rajonin e Khersonit: Do të rindërtojmë zonën

Pas vizitës në rajonet lindore të Donetskut dhe Kharkivit, presidenti i Ukrainës, Volodymyr Zelensky udhëtoi në rajonin jugor të Khersonit, pranë vijës së frontit të luftës.

Zelensky vizitoi fshatin Possad-Pokrovske, i cili është shkatërruar nga luftimet me trupat ruse.

“Unë mendoj se ne do ta rindërtojmë shumë shpejt vendin”, u tha Zelensky banorëve në një video të publikuar në Telegram.

Ai vizitoi gjithashtu një stacion të shpërndarjes së energjisë elektrike të dëmtuar nga bombardimet, raportuan mediat ndërkombëtare.

Zelensky shoqërohej nga zëvendëskryetari i qeverisë, Oleksandr Kubrakov, ministri i Energjisë, Herman Halushchenko dhe kreu i operatorit të rrjetit elektrik “Ukrenergo”, Volodymyr Kudrytskyi.

Në nëntor, trupat ruse në Kherson Oblast u tërhoqën në bregun lindor të lumit Dnipro, i cili përshkon rajonin.

Kjo është dita e dytë e Zelensky në zonat pranë vijës së frontit të luftës.