Një ngjarje tragjike ka tronditur lagjen Cërniçe të Shkupit, ku një çift shtetasish nga Taivani është gjetur pa shenja jete në një apartament, në ndërtesën e njohur edhe si vendbanimi i dikurshëm i ish-kryeministrit Nikolla Gruevski.
Bëhet fjalë për një grua 50-vjeçare (Ç.T.J.) dhe bashkëshortin e saj 37-vjeçar (Sh.L.F.), trupat e të cilëve janë gjetur rreth orës 13:50.
Ngjarja bëhet edhe më e rëndë për faktin se vajza e gruas, N.M., kishte denoncuar zhdukjen e tyre në polici vetëm disa orë më herët, në orën 00:49 të 2 shtatorit.
Prania e madhe e policisë dhe automjeteve funerale alarmoi banorët e zonës, të cilët nuk kishin dijeni se çfarë kishte ndodhur brenda apartamentit.
Nga këqyrja fillestare e mjekut të Institutit të Mjekësisë Ligjore nuk janë konstatuar shenja të dukshme dhune në trupat e viktimave.
Trupat janë dërguar për autopsi, e cila pritet të përcaktojë shkakun e saktë të vdekjes.
Ndërkohë, policia ka nisur hetimet për të zbardhur plotësisht rrethanat misterioze të kësaj ngjarjeje tragjike në Shkup.
