Pas një fillim sezoni me luhatje të shumta, kampionët në fuqi të NBA, Toronto Raptors kanë rigjetur formën më të mirë dhe këtë mbrëmje arritën të triumfojnë me rezultatin 106-115 në transfertën ndaj Indiana Pacers, duke regjistruar fitoren e 13 radhazi, që e ka ngjitur në vendin e dytë në Konferencën e Lindjes.
Me përjashtim të fraksionit të dytë, që foli për skuadrën nga Indianapolisi, komplet pjesa tjetër e lojës foli për kanadezët, që menaxhuan mirë avantazhin e krijuar dhe arritën të dalin triumfatorë nga kjo transfertë, falë edhe formës së mirë të Ibaka e VanVleet.
Një nga përballjet më spektakolare të mbrëmjes ishte ajo e zhvilluar në “Capital One Arena” mes Washington Weizards dhe Dallas Mavericks, që u fitua nga skuadra vendase me shifrat e ngushta 119-118.
Sfida nisi më mirë për Dallasin, që mori avantazhin me 4 pikë diferencë pas fraksionit të parë, por më pas reagimi i vendasve, të udhëhequr nga Bradley Beal me 29 pikë, 5 rikuperime dhe 8 asiste, ishte mjaft i mirë dhe arritën të përmbysin rezultatin e të marrin triumfin.
Mori fitoren e 6 radhazi në kampionat edhe Boston Celtics, që e udhëhequr nga Jayson Tatum me 32 pikë, 4 rikuperime e 6 asiste, arriti të triumfojë me shifrat 112-107 përballë skuadrës së Atlanta Hawks.
Në sfidat e tjera Philadelhpia 76ers triumfoi 119-107 përballë Memphis Grizzlies, Ocklahoma City Thunder mposhti me shifrat 108-101 Detroit Pistons, ndërsa Phoenix Suns, e udhëhequr nga Oubre e Booker, fitoi me rezultatin e thellë 127-91 ndaj Houston Rockets. /SS/