Drejtuesja e Tetovës në tetë vitet e kaluara, Teuta Arifi, sot ia ka dorëzuar detyrën kryetarit të ri të komunës Bilall Kasami, pas humbjes në zgjedhjet e së dielës, shkruan gazeta LAJM. Pas procedurës së pranim-dorëzimit, zonja Arifi është përshëndetur me të punësuarit ndërsa përmes një konference për media ka falendëruar qytetarët për mbështetjen 8 vjeçare. Mirënjohëse është treguar edhe ndaj medieve, administratës komunale dhe familjes së saj.
“Sot e kryem ashtu siç kërkojnë rregullat demokratike procedurën e pranim-dorëzimit, sipas vullnetit të shprehur nga ana e qytetarëve. Dëshiroj që kryetarit të zgjedhur tanimë t’i dëshiroj suksese në punën e tij ashtu që të bëhen punë sa më të mira për qytetin tonë dhe qytetarët tanë. Shfrytëzoj rastin që të falënderoj gjithë qytetarët për mbështetjen 8 vjeçare dhe të administratës për punën e bërë. Falënderoj edhe mediat dhe familjet time”, u shpreh Teuta Arifi pasi ia dorëzoi mandatin kryetarit të ri të Tetovës, Bilall Kasamit./Gazeta LAJM
