Në Qendrën sportive “Boris Trajkovski” pasnesër do të fillojë vaksinimi masiv me “Spitnik V” dhe për atë ditë janë caktuar pothuajse 3000 terminet e para.
Në këtë fazë, do të imunizohen qytetarët nga infrastruktura kritike – njerëzit që punojnë, MPB-ja, ARM-ja, gazetarë, shërbimet nga Qyteti i Shkupit dhe të gjithë që kanë kontakte – shoferët e autobusëve, zjarrfikësit, mësuesit e kopshteve, punonjësit në pikat e pagesës së taksës rrugore … Sipas planit, vaksinimi me 20.000 vaksina ruse “Sputnik” të dhuruara nga Serbia do të bëhet në 48 pika.
Në sallë sot u bë një provë se si do të funksionojë dhe do të koordinohet vaksinimi masiv – vendet ku do të pranohen qytetarët, pastaj ekzaminimi individual dhe vaksinimi, pikat ku do të lëshohen certifikatat me kushtet për rivaksinim, vendi për frigoriferë për vaksinat … Do të ketë një ekip prej rreth 20 infermierësh dhe pesë mjekësh në dy turne, vende për 15-20 minuta vëzhgim pas vaksinimit dhe pjesë të shënuara për kujdesin urgjent mjekësor nëse është e nevojshme.
Ministri Venko Filipçe gjatë vizitës së tij në QS “Boris Trajkovski” deklaroi se në fillim në mesatare prej rreth 4000 njerëz në ditë do të vaksinohen në të gjithë vendin dhe beson se për një kohë të shkurtër do të përmbushet edhe plani të arrihen 7000 termine në ditë, kur sistemi do të bëhet funksional në mënyrë të plotë.
“Besoj se sistemi do të funksionojë mirë. Këtu e replikojmë në një hapësirë shumë më të madhe sistemin që kishim në Spitalin modular, ku u vaksinuan punëtorët shëndetësorë. Besoj se qytetarët do të kenë dëshirë dhe vullnet për t’u vaksinuar. Me ardhjen e sasive të reja dhe më të mëdha të vaksinave këtë muaj, kufiri i moshës do të ulet gjithnjë e më shumë”, tha Filipçe, i cili është i kënaqur me rrjedhën aktuale të procesit të vaksinimit në vend. Deri dje janë vaksinuar 1300 qytetarë.
Për vaksinimin masiv, në sallë do të angazhohen edhe punonjës nga administrata e Ministrisë së Shëndetësisë, qendrat shëndetësore, Instituti i Shëndetit Publik.
