Futbollisti i skuadrës maqedonase, Struga Trim&Lum, Arlind Shabani edhe pse vetëm 19 vjeçar po mahnitë të gjithë me performancat e tij.
Shabani është nga qyteti i Obliqit dhe këtë vit u transferua në skuadrën elitare të Maqedonisë së Veriut.
Performancat e tij nuk i kanë ikur agjentëve dhe skuatëve të skuadrave evropiane. Indeksonline mëson se 19 vjeçari është bërë cak i skuadrave nga Turqia dhe Kroacia.
Po ashtu Indeksonline mëson që edhe skuadra maqedonase, Makedonia GP ka shprehur interesim për të.
Shabani në Kosovë ka luajtur për skuadrat si Trepça 89, Ramiz Sadiku dhe KEK-u. Skuadra ku tash ai luan, Struga Trim&Lum, është në pozitën e katërt në ligë dhe është në gjysmë-finale të Kupës së Maqedonisë së Veriut.
Arlind Shabani pritet që në të ardhmen të jetë një aset i shtuar për kombëtaren e Kosovës. Ai ka marrë nofkën “Luka Modrici kosovar” për shkak të pamjes dhe lëvizjeve të ngjashme me ish-fituesin e “Topit të Artë”./Indeksonline/