Thibaut Courtois iu nënshtrua testeve të hënën në mëngjes pasi humbi ndeshjen e Real Madridit kundër Real Mallorcas të dielën dhe lajmi i mirë për Los Blancos është se lëndimi i tij nuk është serioz.
Kjo do të thotë se ai nuk përjashtohet për në finalen e Kupës së Botës për Klube, nëse Real Madrid do të kalojë gjysmëfinalen, por pjesëmarrja e tij do të varet nga mënyra se si ai evoluon në ditët në vijim.
Portieri belg nuk do të luajë në gjysmëfinale, pasi nuk ka udhëtuar në Rabat me bashkëlojtarët e tij të hënën pasdite.
Megjithatë, ai mund t’u bashkohet atyre të enjten ose të premten nëse arrin të rikuperohet në kohë dhe Real Madrid të kalojë në finale.
Gjysmëfinalja e tyre kundër Al Ahly do të zhvillohet të mërkurën, më 8 shkurt, në stadiumin Prince Moulay Abdellah.
Courtois ndjeu dhimbje gjatë ngrohjes që titullarët e Real Madridit po bënin në terrenin Son Moix përpara duelit të së dielës kundër Mallorcas.
Ai ka njoftuar menjëherë trajnerin e portierëve, Luis Llopis dhe stafin mjekësor. Së bashku ata vendosën se ai nuk do të rrezikonte të luante në atë takim.
Ancelotti dhe stafi i tij e morën këtë vendim për shkak të kalendarit të ngjeshur të Real Madridit në shkurt. Los Blancos mund të luajë tetë ndeshje në katër gara të ndryshme, duke përfshirë katër në La Liga, dy në Kupën e Botës për Klube, një në Kupën e Mbretit dhe një për Ligën e Kampionëve.
Real Madridi informoi zyrtarët se Andriy Lunin do të zëvendësonte Courtoisin kundër Mallorcas, aty ku pësuan humbje 1-0.
