Shkup – SDSM ka ngritur akuza të reja për lidhje të mundshme familjare dhe biznesore në ndarjen e tenderëve në Ministrinë e Transformimit Digjital, duke pretenduar se tre kontrata me vlerë totale prej rreth 1.5 milionë euro janë lidhur me një kompani që, sipas partisë, ka lidhje të mëparshme biznesore me bashkëshortin e sekretarës shtetërore në Ministri.
Anëtari i Kryesisë së SDSM-së, Jon Frçkoski, në një konferencë për shtyp deklaroi se bëhet fjalë për kontrata të lidhura me kompaninë “Noma System Solutions” – dega në Shkup, që kanë të bëjnë me mirëmbajtjen e sistemit për menaxhimin e dokumenteve, softuerin për regjistrin e pronës dhe softuerin për provime.
Sipas pretendimeve të SDSM-së, drejtues i kompanisë është Vladimir Simovski, i cili më herët ka qenë partner biznesi dhe bashkëpronar me Martin Klinçarov, bashkëshortin e sekretarës shtetërore në Ministrinë e Transformimit Digjital, në kompaninë “SVAG Food DOO Shkup”.
SDSM ngre pikëpyetje edhe për strukturën e pronësisë së kësaj kompanie. Nga partia thonë se pjesë pronësie në “SVAG Food” ka pasur edhe “Mateo Dizajn”, kompani në pronësi të Klinçarovit.
Pikërisht kontratat e “Mateo Dizajn”, me vlerë prej rreth 50 mijë eurosh, kanë qenë më herët objekt akuzash nga SDSM. Sipas partisë, për këtë rast Komisioni Shtetëror për Parandalimin e Korrupsionit (KShPK) ka hapur procedurë.
SDSM: Po zgjerohet “rrjeti familjar-tenderik”
Nga partia opozitare pretendojnë se kontratat e reja ngrenë dyshime për një vazhdimësi të asaj që e quajnë “rrjet familjar-tenderik”, duke kërkuar nga KShPK-ja që të zgjerojë rastin dhe të hetojë më në detaje marrëdhëniet mes kompanive dhe personave të përmendur, përfshirë edhe rrjedhat financiare.
“Duhet të hetohet nëse pas këtyre kontratave ekzistojnë lidhje të drejtpërdrejta apo të tërthorta biznesore dhe financiare”, është qëndrimi i përcjellë nga SDSM.
Partia kërkoi gjithashtu përgjegjësi politike nga ministri i Transformimit Digjital, Stefan Andonovski, si dhe dorëheqjen e tij, duke e lidhur çështjen me mënyrën e menaxhimit të procedurave të prokurimeve publike në Ministri.
Megjithatë, bëhet fjalë për akuza të paraqitura nga SDSM, ndërsa në kumtesën e dorëzuar për media nuk është përmendur reagim nga Ministria e Transformimit Digjital, kompanitë apo personat e përmendur. Deri në një reagim të tyre, pretendimet e bëra nga opozita mbeten akuza që kërkojnë verifikim nga institucionet kompetente.
