Avdyl Salihu është shpallur menaxher dhe matchmaker i vitit 2019 nga Federata Profesionale e boksit të Maqedonisë “Pro Boxing Macedonia”. Deri tek ky sukses, Salihu ka arritur me plot meritë, pasi me boksierët e tij si dhe me ndërmjetësimet që ka bërë në ballafaqime boksi u paraqit në shumë evente të fuqishme si në Gjermani, Zvicër, Itali, si dhe në disa vende të tjera evropiane, ndërkohë që i njëjti ishte edhe aktor kryesor për organizimin e titullit botëror të boksit WBF.
Salihu tregon se sivjet ka organizuar 27 ndeshje profesionale si dhe ka përfituar 5 boksierë professional, duke shënuar vetëm fitore dhe asnjë humbje. Këtu veçohet Arben Shemallari, i cili ka arritur katër fitore për 5 muaj nën menaxhim të “ArenaRing Management Promotion”.
“Jam shumë i gëzuar me këtë shpërblim pasi angazhimi, sakrifica e, streset u shpërblyen me sukses dhe për këtë e falënderoj njeriun numër një, Darko Catlevski nga ‘Pro Boxing Macedonia’ i cili nga fillimi më ka besuar dhe mbështetur, duke më dhënë licencën e Menaxherit dhe Promotorit. Poashtu falënderoj edhe bashkëpunëtorët e mi nga Evropa, ndër ta legjendën e boksit, Muharem Gjocaj si dhe kampionët:Albert Krieziu, Mustaf Kicaj e Ervis Bici. Këta të fundit edhe pse vijnë nga sporti i K1 dhe Muay Thai kanë ndikuar në zhvillimin tim, pasi një kohë jam marrë edhe me kikboks”, thotë Salihu duke shtuar se falënderon edhe familjen e tij si dhe axhallarët, Aziz Salihu e Faton Salihu që e kanë mbështetur gjithmonë në konsultime të ndryshme.
“Ky profesion kërkon të keni kontakte dhe raporte të mira me menaxherë, matchmaker dhe promotor të ndryshëm botëror dhe për fat të mirë kam krijuar një grup të mire, dhe bashkëpunimi po shkon siç është më së miri. Sivjet kam pasur 8 ndeshje me boksierët e mi dhe të gjitha i kemi fituar, ndërkohë që kam pasur edhe shumë ndërmjetësime (matchmeking) me boksier evropian ndër ta edhe për titull bote WBF, ku u desht të ndeshet Labinot Xhoxhaj. Deri tek ky mec nuk erdhi, për shkak të një lëndimi. I njëjti u anulua. U ndjeva keq, por boksi kështu e ka, në momentin e fundit mund të anulohen përballjet dhe e gjithë puna shkon huq”, deklaroi Salihu, i cili ka plane të mëdha në të ardhmen.
“Vitin 2020 planifikoj ti organizoj dy gala, njërën në Wiesbaden të Gjermanisë, kurse tjetrën në Kosovë ku do të zhvillohen nga 10 ndeshje profesionale, ndërkohë që planifikoj me boksierin tim, Arben Shemallari ti bëj ndeshje për titull. Poashtu së bashku me Darko Catlevski kemi planifikuar që vitin 2020 të zhvillojmë shumë aktivitete në Maqedoni, ndër tjera do të bëjmë disa filtrime për të angazhuar boksier të ri në boksin profesionist, normal ata që e meritojnë dhe kanë kualitet”, përfundoi Avdyl Salihu.
