Ish-drejtori sportiv i Brescias, Gianluca Nani, e ka përkrahur Andrea Pirlon duke thënë se ai ia kujton paska Pep Guardiolës, përderisa i ka uruar suksese trajnerit të ri të Juventusit.
Andrea Pirlo u emërua trajneri i ri i Juventusit të shtunën, vetëm disa orë pasi gjiganti i Serisë A e shkarkoi Maurizio Sarrin pas vetëm një sezoni në drejtim të skuadrës, pas eliminimit nga Liga e Kampionëve.
Emërimi i 41-vjeçarit i befasoi shumë tifozë pasi që ai vetëm sapo ishte emëruar trajner i ekipit U23 të Juventusit, në fund të korrikut. Megjithatë, ai tani do ta marrë drejtimin e kampionit të Serisë A pa pasur asnjë ndeshje përvojë si trajner.
Megjithatë, Nani beson se përkundër që nuk ka përvojë, Pirlo i ka të gjithë atributet e nevojshme për të pasur sukses në Juventus.
“Ai e ka karakter të fortë. Nuk flet shumë kështu që njerëzit mendojnë që ai është gjithmonë i heshtur. Por, nuk është e vërtetë që ai nuk flet kurrë”, ka thënë Nani për DailyMail.
“Ai ka qenë gjithmonë lideri në skuadër me bashkëlojtarët e tij, është shumë i pëlqyeshëm dhe e ka një mentalitet të fortë fituesi. Ai është shumë pozitiv dhe e ka fituar këtë mentalitet”.
“Sipas meje, ai do të bëhet një top trajner, me të vërtetë e besoj këtë. Është paksa si Guardiola, i shoh të dy duke luajtur futboll të bukur e ofensiv. Edhe si lojtar, ai e kishte të njëjtën qasje si të Guardiolës”.
