Kina paraqiti të enjten një plan që synon përmirësimin e mëtejshëm të sigurimeve shoqërore, shërbimeve publike dhe standardeve të jetesës për personat me aftësi të kufizuara gjatë pesë viteve të ardhshme.
Plani për mbrojtjen dhe zhvillimin e personave me aftësi të kufizuara gjatë periudhës së 15-të të Planit Pesëvjeçar (2026-2030), u publikua nga Komiteti i Punës i Këshillit Shtetëror për Aftësinë e Kufizuar, duke përshkruar objektivat kryesore të zhvillimit, masat politike dhe programet kryesore të shërbimeve për këtë periudhë.
Sipas planit, Kina do të ndjekë 32 detyra në shtatë fusha kryesore, duke përfshirë krijimin e një sistemi më të qëndrueshëm të sigurimeve shoqërore dhe shërbimeve të kujdesit për personat me aftësi të kufizuara deri në vitin 2030, duke krijuar gjithashtu mundësi punësimi më gjithëpërfshirëse dhe me cilësi më të lartë për ta.
Plani premton shërbime publike bazë më të sakta dhe efikase, jetë më të pasur kulturore dhe shpirtërore, vitalitet më të madh në mbështetjen e aftësisë së kufizuar të asistuar nga teknologjia, si dhe një mjedis shoqëror më gjithëpërfshirës dhe të arritshëm.
Cilësia e përgjithshme e jetës dhe kapaciteti i zhvillimit të personave me aftësi të kufizuara, pritet të përmirësohen më tej gjatë pesë viteve të ardhshme, sipas planit.
Sipas Federatës së Personave me Aftësi të Kufizuara të Kinës, deri në fund të vitit 2025, rreth 27.74 milionë persona me aftësi të kufizuara kishin marrë pjesë në programin bazë të sigurimit të pleqërisë dhe 12.96 milionë merrnin përfitime pensioni. Midis personave të regjistruar me aftësi të kufizuara, rreth 8.9 milionë ishin të punësuar.
