Moti ekstrem godet Evropën me nxehtësi rekord dhe stuhi të forta

Moti ekstrem vazhdon të bëjë “kërdinë” në Evropë, ku temperaturat e larta dhe stuhitë e forta po prekin rajone të ndryshme.

Në këtë drejtim, shkruan Euronews, Serbia aktualisht po përjeton valën e parë të të nxehtit të sezonit, me temperatura që pritet të rriten në të gjithë vendin.

Parashikimet parashikojnë se merkuri mund të arrijë deri në 40ºC këtë javë për shkak të një anticikloni të avancuar nga Afrika.

Në Rumani, banorët e Bukureshtit po përballen me një tjetër valë të nxehti që nga e mërkura kur temperaturat u rritën në rreth 40ºC në pjesën jugore të vendit.

Vapa e fortë e ktheu kryeqytetin rumun në një “skenë verore”, me shumë banorë që kërkojnë freskim në një liqen lokal dhe në burimet e parqeve, duke i dhënë qytetit një ambient tropikal.

Në pjesën tjetër, në Gjermani, stuhi dhe moti i keq goditën disa pjesë të Saksonisë të martën.

Në distriktin e Meissen, erërat e forta ngritën alarmin, me raportime për një tornado të mundshme në qytetin e Gröditz.

Moti i ashpër në vendin pritës të Euro 2024 shkaktoi dëme të konsiderueshme, duke shkatërruar linja të shumta të energjisë dhe duke dëmtuar çatitë.

Copernicus, agjencia e monitorimit të klimës së Bashkimit Evropian, raportoi në fillim të muajit se maji i kaluar ishte më i ngrohti i regjistruar në botë. Sipas të dhënave të tyre, ky shënoi muajin e dymbëdhjetë radhazi të nxehtësisë rekorde.