Policia (Ministria e Punëve të Brendshme – MPB) ka regjistruar 11 raste të dhunës në familje brenda një dite. Shtatë persona janë arrestuar, dhe ndër rastet më serioze, janë një përpjekje për të djegur një shtëpi, një sulm me një objekt druri dhe një burrë i dehur që e theu derën e shtëpisë me makinë.
Gjatë ditës e natës së kaluar, policia ka ndërhyrë në 11 raste të dhunës në familje në të gjithë vendin, me c’rast 7 persona janë privuar nga liria për shkak të sulmeve fizike, kërcënimeve dhe sjelljes agresive ndaj anëtarëve të familjes.
Një nga rastet më serioze u regjistrua në Tetovë, ku një grua 51-vjeçare raportoi se burri i saj fillimisht e kërcënoi atë dhe vajzën, ndersa më pas u përpoq të digjte shtëpinë familjare.
Në një rast tjetër të rëndë në Gostivar, policia arrestoi H.K. pasi gruaja e tij 42-vjeçare raportoi se rreth orës 4 të mëngjesit ai kishte kaluar me makinë derën e shtëpisë së prindërve të saj, kishte thyer një dritare me një objekt të fortë dhe më pas e kishte sulmuar fizikisht. Gjatë një kontrolli policor, u përcaktua se ai kishte 1.70 promil alkool në gjak.
Në Ohër u ndalua 34-vjeçari N.D., i cili, sipas raportit, e sulmoi fizikisht partneren e tij në shtëpinë familjare.
Në Kërçovë, policia ndaloi 31-vjeçarin T.S., i cili u soll në mënyrë agresive ndaj anëtarëve të familjes së tij dhe dëmtoi disa nga sendet shtëpiake.
Në Gostivar, pas një raportimi nga një grua 46-vjeçare, u arrestua edhe 51-vjeçari I.M., i cili e sulmoi fizikisht gruan e tij në shtëpinë e tyre.
Në Manastir, policia e arrestoi personin me inciale E.A. (48), i dyshuar për sulm fizik ndaj gruas së tij 26-vjeçare, ndërsa O.V. (47) nga fshati Banjica, Strumicë, u ndalua gjithashtu në Tregun e Qytetit, i cili sulmoi gruan e tij me një objekt prej druri.
Në Prilep u ndalua edhe 43-vjeçari A.A., i cili, sipas policisë, kishte kërcënuar babanë e tij.
Përveç rasteve në të cilat u kryen arrestime, në Shkup, Spitali i Përgjithshëm i Qytetit “8 Shtatori” raportoi se një grua 69-vjeçare kërkoi ndihmë mjekësore, duke pretenduar se ishte abuzuar fizikisht dhe mendërisht nga vajza e saj.
Në Shkup, një grua 51-vjeçare raportoi se ishte sulmuar fizikisht nga partneri i saj jashtëmartesor.
Në Kumanovë, një grua 44-vjeçare raportoi se ish-partneri i saj e kishte kërcënuar.
Ministria e Brendshme informon se po merren masa për sqarimin e plotë të të gjitha rasteve, pas së cilave do të ngrihen akuza përkatëse kundër të dyshuarve.
