Kryetari i Lëvizjes Vetëvendosje, Albin Kurti sot ka qëndruar në Prizren me rastin e Ditës Përkujtimore të Holokaustit, ku ka folur për mbarëvajtjen e bisedimeve me Lidhjen Demokratike të Kosovës.
Edhe pse kanë kaluar tre muaj negociata, Kurti nuk mendon që është vonë për arritjen e marrëveshjes dhe krijimin e qeverisë.
Ai para gazetarëve në Prizren, ka thënë se e kupton që ka frustrim të madh, por tashmë janë afatet kushtetuese dhe qytetarët nuk do të presin më gjatë se në fillim të javës së ardhshme.
I pari i LVV-së, Albin Kurti, bëri të ditur për mediat që komunikimin me LDK-në e kanë pasur të vazhdueshëm dhe që sot do të kenë takimin e radhës, në përpjekje për të finalizuar marrëveshjen bashkëqeverisëse.
Ndër të tjerash Kurti bëri të ditur se në qeverisjen e tyre do të jenë të pranishme edhe pakicat dhe përfaqësuesit e tyre, në mënyrë që përfundimisht vitin 2020 të fillojë me një qeverisje të mbarë e të mirë dhe me program të harmonizuar.