Një tërmet me magnitudë 6.2 ka goditur jugun e Italisë në orët e para të mëngjesit të së martës, duke shkaktuar shqetësim te banorët e zonës, të cilët u zgjuan nga lëkundjet e forta të tokës.
Sipas të dhënave paraprake, tërmeti u regjistrua në orën 00:12 me orën lokale, rreth 10 milje (16 kilometra) në jugperëndim të Saracenës, në rajonin e Kalabrisë. Epiqendra ndodhej afërsisht 32 kilometra larg qytetit të Kozencës.
Lëkundja sizmike ndodhi në një thellësi prej më shumë se 250 kilometrash nën sipërfaqen e tokës dhe u vlerësua fillimisht me intensitet IV në Shkallën e Modifikuar të Intensitetit Mercalli, raportojnë mediat italiane transmeton Klankosova.tv.
Ky nivel intensiteti konsiderohet i lehtë, por mjaftueshëm i fortë për t’u ndjerë nga shumë persona brenda ndërtesave dhe për të zgjuar njerëzit që ishin në gjumë. Gjatë tërmetit, enët, dritaret dhe dyert mund të kenë lëvizur, ndërsa në disa raste janë raportuar tinguj kërcitjeje nga muret. Edhe automjetet e parkuara mund të jenë lëkundur lehtësisht.
Deri tani, autoritetet italiane nuk kanë raportuar dëme materiale apo persona të lënduar si pasojë e tërmetit.
Ndërkohë, ekspertët dhe institucionet përgjegjëse vijojnë monitorimin e zonës për të evidentuar çdo aktivitet të mëtejshëm sizmik dhe për të vlerësuar situatën në terren.
