Kryeministri në detyrë, Avdullah Hoti, përmes një telegrami ka ngushëlluar familjen e gazetarit tashmë të ndjerë Bedri Sadiku, përcjell “Zeri.info”.
Hoti theksoi se puna dhe angazhimi i Sadikut në gazetën “Rilindja” në Prishtinë ka qenë kontribut i çmuar për lirinë dhe pavarësinë e Kosovës.
“Puna dhe angazhimi i tij në gazetën ‘Rilindja’ në Prishtinë gjatë viteve të ’80-ta dhe pastaj gjatë viteve të ’90-ta në Tiranë dhe Shkup ishte kontribut i çmuar për lirinë dhe pavarësinë e Kosovës dhe çështjen kombëtare shqiptare”, thuhet në telegramin e Hotit.
Telegrami i plotë:
E nderuara familje Sadiku,
I nderuar komunitet i gazetarëve,
Me pikëllim të thellë mora lajmin për ndarjen nga jeta të gazetarit Bedri Sadiku, i cili me punën e tij të palodhshme për dekada me radhë njoftoi opinionin për shkeljen e të drejtave të shqiptarëve.
Puna dhe angazhimi i tij në gazetën “Rilindja” në Prishtinë gjatë viteve të ’80-ta dhe pastaj gjatë viteve të ’90-ta në Tiranë dhe Shkup ishte kontribut i çmuar për lirinë dhe pavarësinë e Kosovës dhe çështjen kombëtare shqiptare.
Ikja në amshim e doajenit të gazetarisë kosovare Bedri Sadiku është humbje e madhe jo vetëm për familjen, por edhe për miqtë dhe bashkëpunëtorët e tij.
E nderuara familje Sadiku dhe gjithë komuniteti i gazetarëve, pranoni ngushëllimet e mia më të sinqerta!