Rajon-Botë Francezët vazhdojnë me protestat kundër reformës së pensioneve

Francezët vazhdojnë me protestat kundër reformës së pensioneve

Të enjten, Franca po përgatitet për një ditë tjetër protestash dhe grevash për të dënuar reformën e pensioneve të presidentit Emmanuel Macron, pasi negociatat mes qeverisë dhe sindikatave përfunduan në ngërç.

Ka pasur shenja se lëvizja e protestës dy mujore e gjysmë ka filluar të humbasë vrullin dhe sindikatat do të shpresojnë për një pjesëmarrje masive në ditën e 11-të të aksionit që nga janari. Të gjitha palët në konflikt janë në pritje të një vendimi nga Këshilli Kushtetues i Francës, i cili ka fuqinë për të shfuqizuar një pjesë apo edhe të gjithë legjislacionin, më 14 prill për reformën.

Macron, aktualisht jashtë vendit për një vizitë në Kinë, përballet me sfidën më të madhe të mandatit të tij të dytë lidhur me reformën e tij kryesore të sistemit të pensioneve, e cila përfshin rritjen e moshës minimale të pensionit nga 62 në 64 vjeç .

Protestat u përshkallëzuan në trazira të dhunshme pasi kryeministrja Elizabeth Bourne thirri një urdhër ekzekutiv të diskutueshëm më 16 mars për ta shtyrë projektligjin në parlament pa votim.

Sindikatat thanë se takimi i së mërkurës me Bourne nuk solli përparim pasi ajo refuzoi të diskutonte rikthimin e moshës minimale të pensionit prej 64 vjeç .

“Është e qartë se është një dështim kur kryeministri as që dëshiron të lejojë një rrugë për këtë diskutim,” tha Cyril Chabanie, duke folur në emër të tetë sindikatave kryesore të vendit, pasi ata u larguan vetëm një orë pas bisedimeve.

Ky ishte takimi i parë i tillë midis dy palëve që kur qeveria prezantoi projektligjin e diskutueshëm të pensioneve në janar.

Ndërsa refuzoi të lëvizte për këtë çështje, Bourne tha se nuk do të çonte përpara asnjë çështje tjetër të punës “pa partnerët socialë”.

Qeveria thotë se ndryshimet janë të nevojshme për të parandaluar rënien e sistemit të pensioneve në deficit.

Në pjesën tjetër të Evropës, njerëzit kryesisht dalin në pension në fund të të 60-ave pasi jetëgjatësia është rritur.

Kritikët thonë se reforma e pensioneve është e padrejtë ndaj punëtorëve në profesione të rënda që e nisin karrierën herët, si dhe ndaj grave që ndërpresin jetën e tyre të punës për të rritur fëmijët.

Protestat u intensifikuan pasi qeveria përdori fuqi të veçanta për ta shtyrë projektligjin në parlament pa votim, me zhgënjimin e publikut që u kthye në një humor më të gjerë kundër presidentit Macron.