Manchester City e ka fituar sfidën e parë gjysmëfinale të Ligës së Kampionëve ndaj Real Madridit në Etihad Stadium, në ndeshjen në të cilën u realizuan shtatë gola (4-3).
Në fraksionin e parë të këtij takimit, të cilësuar si “finalja para finales”, dy gola i realizuan vendasit dhe një gol e shënuan mysafirët.
Që në minutën e dytë e takimit, pas një harkimi në zonë nga Riyad Mahrez, Kevin De Bruyne e zhbllokoi rezultatin duke shënuar me kokë.
(Foto: Twitter/Manchester City)
Nuk zgjati shumë dhe vendasit e realizuan edhe golin e dytë. Kësaj radhe De Bruyne asistoi për Gabriel Jesus, i cili e dyfishoi avantazhin (11’).
Citizens i dominuan minutat në vazhdim dhe patën raste të tjera shënimi, të cilat nuk ia dolën t’i konkretizonin.
(Foto: Twitter/Real Madrid C.F.)
Sidoqoftë, prania e Karim Benzemas në fushë u shënjua me ngushtimin e rezultatit. Ferland Mendy harkoi në zonë, ndërsa sulmuesi francez ishte efektiv për ta ngushtuar rezultatin (33’).
Ashtu siç e nisi pjesën e parë, City në të njëjtën mënyrë e filloi edhe fraksionin e dytë me një aksion të shpejtë nga Riyad Mahrez, i cili e goditi shtyllën, derisa Phil Foden nuk e shfrytëzoi topin e kthyer për të realizuar, sepse goditja e tij u bllokua.
(Foto: Twitter/Football Tweet)
Mirëpo, mesfushori anglez shfrytëzoi një harkim nga Fernandinho në zonë për të shënuar me kokë në portën e Thibaut Courtois (53’).
Porse i menjëhershëm ishte reagimi i Los Blancos, të cilët e realizuan golin e dytë për ta ngushtuar sërish rezultatin (3-2). Vinicius Junior bëri gjithçka vet duke e marrë topin para mesit të fushës shkoi deri te goli dhe e nënshtroi portierin Ederson (55’).
(Foto: Football Tweet)
Në vijim ishte Bernardo Silva, futbollisti që e gjeti rrjetin për golin e katërt të ekipit nikoqir që ishte i bukur (74’).
Megjithatë, nuk zgjati shumë dhe u akordua penallti për Realin për prekje të topit me dorë në zonë dhe përgjegjësinë e mori Karim Benzema për të treguar klasin e tij duke shënuar me panenka (82’).
Pas kësaj fitoreje, Manchester City ka epërsi prej një goli kundrejt Real Madridit, mirëpo gjithçka mbetet e hapur, duke qenë se ndeshja kthyese zhvillohet në Santiago Bernabeu.
