Daniele De Rossi po bën mrekulli me Romën, që prej momentin që e morri drejtimin e klubit të tij të zemrës.
Ish-mesfushori legjendar i Romës ka marrë drejtimin e klubit tre muaj më parë dhe deri tani në 16 ndeshje ka 11 fitore, tre barazime dhe vetëm dy humbje, një e parëndësishme në Ligën e Evropës 1-0 nga Brighton pas fitores 4-1 në ndeshjen e parë dhe një tjetër nga Interi.
Fabio Capello ka folur sërish për trajnerin e ri italian, duke e lavdëruar atë për punën fantastike që bëri në ndeshjen ndaj Milanit, ku Roma fitoi 0-1 në San Siro në ndeshjen e parë çerekfinale në Ligën e Evropës.
77-vjeçari, theksoi se te De Rossi vlerëson pragmatizmin ndërsa shtoi se ai është shumë i zgjuar taktikisht.
“Një karakteristikë që më pëlqen te De Rossi është pragmatizmi. Ai është shumë i zgjuar taktikisht si dhe studion shumë. Milanin përshembull e kishte studiuar në detaje”.
“De Rossi ishte shumë i zoti që në momentin kur mori skuadrën të risillte besimin, përfshiu të gjithë lojtarët dhe kështu u shndërrua në një personazh të dashur nga të gjithë”.
“Duhet ta them se ishte me fat që pati disa ndeshje të lehta në fillim, por falë atyre rezultateve ndërtoi forcën e grupit dhe u bë një lider i vërtetë”, tha Capello.
Me De Rossin në krye të skuadrës, Roma zë vendin e pestë në Serie A me vetëm tre pikë larg Bolognës së vendit të katërt dhe shtatë më pak se Juventusi që ndodhet në vendin e tretë.
