BE-ja miraton ligjin për të “restauruar” 20 për qind të tokës dhe detit të bllokut deri në fund të dekadës

BE-ja ka miratuar një ligj historik për të mbrojtur natyrën, duke i dhënë fund një bllokimi prej muajsh midis shteteve anëtare të trembura nga protestat e ashpra të fermerëve.

Ligji i cili ka rezultuar të jetë shtylla më e diskutueshme e Marrëveshjes së Gjelbër Evropiane dhe pothuajse dështoi, vendos një objektiv për të “restauruar” të paktën 20 për qind të tokës dhe detit të BE-së deri në fund të dekadës.

Ligjvënësit dhe qeveritë e kishin zbutur propozimin në muajt përpara zgjedhjeve evropiane, në të cilat partitë e ekstremit të djathtë fituan vende dhe partitë e gjelbra i humbën ato.

Por, pavarësisht lëshimeve, mbështetësit mezi fituan mjaft vota nga shtetet anëtare në një votim në Luksemburg, shkruan the Guardian.

“Sot shënon një ditë e rëndësishme për Evropën pasi ne kalojmë nga thjesht mbrojtja dhe ruajtja e natyrës në rivendosjen aktive të saj”, tha Cesar Luena, eurodeputet i qendrës së majtë nga Spanja që udhëhoqi negociatat e Parlamentit Evropian për ligjin.

Mirëpo, deri në momentet e fundit, ishte e paqartë nëse mbështetësit e ligjit kishin mbledhur vota të mjaftueshme për të arritur një “shumicë të kualifikuar” prej 55 për qind të shteteve anëtare që përfaqësonin të paktën 65 për qind të popullsisë së BE-së.

Raporti përfundimtar tregon 20 vende që votuan në favor të ligjit për restaurimin e natyrës.

Finlanda, Hungaria, Italia, Holanda, Polonia dhe Suedia votuan kundër ligjit, ndërsa Belgjika abstenoi. Ata kritikuan koston e propozimit dhe thanë se do të vendoste mbi ta shumë barrë administrative.

Ligji përmban dispozita për të rikthyer rënien e popullatave të pjalmuesve si bletët, deri në vitin 2030. Shtetet anëtare do të duhet gjithashtu të marrin masa dhe të ndihmojnë në mbjelljen e të paktën 3 miliardë pemëve të tjera.

Aktivistët e festuan votimin si një fitore “historike” për natyrën e Evropës, por kritikuan “sulmet e vazhdueshme” që e hodhën poshtë atë.