Nënkryetari i BDI-së, Arber Ademi, ka akuzuar qeverinë e Hristijan Mickoskit dhe koalicionin VLEN se po përpiqen ta zhvendosin përgjegjësinë për hyrjen e bankës serbe „Alta Banka“ në Maqedoninë e Veriut, duke përzier vendime të viteve të ndryshme.
Në një konferencë për media, Ademi prezantoi një kronologji dokumentesh, përmes së cilës pretendon se procedurat kryesore për marrjen e „Stopanska Banka – Manastir“ janë zhvilluar gjatë vitit 2025, nën qeverisjen aktuale.
Ai sqaroi se vendimi qeveritar i 24 tetorit 2023, të cilit i referohet pushteti, kishte të bënte me mbrojtjen e aksioneve të shtetit në një bankë në Serbi dhe jo me marrjen e bankës në Manastir.
Ademi renditi tri data kyçe të vitit 2025:
* 1 shtator: Banka Popullore dha pëlqimin paraprak për fitimin e pjesëmarrjes së kualifikuar.
* 10 shtator: Komisioni i Letrave me Vlerë miratoi ofertën e Alta Bankës për marrjen e bankës në Manastir.
* 23 shtator: Qeveria, me propozim të ministres së Financave, Gordana Dimitrieska-Koçoska, udhëzoi 16 institucione publike të shqyrtonin ofertën për aksionet që posedonin.
Sipas Ademit, oferta për marrjen e bankës u realizua në tetor 2025, ndërsa në dhjetor institucioni mori emrin Alta Banka.
Ai kërkoi nga Mickoski dhe ministrat e VLEN-it të sqarojnë se çfarë verifikimesh janë bërë për pronarët e bankës, si kanë votuar institucionet publike dhe çfarë përgjegjësie kanë pasur institucionet që kanë dhënë miratimet.
Nga ana tjetër, VMRO-DPMNE dhe VLEN kanë drejtuar akuza ndaj ish-funksionarëve të BDI-së, duke përmendur edhe ish-ministrin e Financave, Fatmir Besimi, si dhe transaksionet e kompanisë „AS Senjak“, në pronësi të Selaudin Arifit, krushkut të Ali Ahmetit. Kompania i ka mohuar akuzat dhe ka paralajmëruar padi për shpifje.
„Kjo kronologji nuk mund të ndryshohet me deklarata politike“, deklaroi Ademi.
