Dy të rinj nga Gostivari kanë përfunduar me lëndime trupore pas një sulmi fizik nga disa persona, të cilët fillimisht ua bllokuan rrugën me automjete dhe më pas i sulmuan.
Ngjarja ka ndodhur më 8 nëntor, rreth orës 03:00 pas mesnate, në rrugën lokale ndërmjet fshatrave Çajle dhe Balindoll të Gostivarit.
Sipas Ministrisë së Punëve të Brendshme, sulmuesit kanë ndaluar automjetin me të cilin udhëtonin 23-vjeçari Xh.J. dhe 25-vjeçari A.Z., duke i penguar të vazhdonin rrugën, pas së cilës i kanë sulmuar fizikisht.
Të dy të rinjtë kanë pësuar lëndime trupore, të konstatuara nga mjekët e Qendrës Mjekësore në Gostivar.
Policia po ndërmerr masa për identifikimin e autorëve dhe zbardhjen e plotë të rrethanave të incidentit.
