Reparti gjyqësor në Spitalin Psikiatrik të Bardovcit po përballet me mbingarkesë serioze. Edhe pse kapaciteti është vetëm 40 shtretër, aktualisht aty janë të sistemuar 97 pacientë, njofton drejtori i institucionit, Hisa Abdullai.
Sipas tij, kohët e fundit është shtuar numri i personave të dënuar që dërgohen në këtë repart për trajtim psikiatrik dhe vuajtje të dënimit.
Në repart mbahen rastet më të rënda, ndërsa pacientët e tjerë, përfshirë personat e dënuar për dhunë familjare dhe vepra më të lehta, sistemohen edhe në repartet e tjera të spitalit.
Për shkak të mbingarkesës, drejtori ka paralajmëruar se vitin e ardhshëm është planifikuar rinovimi i repartit gjyqësor.
Sipas procedurave ligjore, trajtimi i detyrueshëm psikiatrik në institucion shëndetësor caktohet nga gjykata, pas vlerësimit profesional të ekspertëve psikiatër.
Çështja e sigurisë në këtë repart është rikthyer në vëmendje edhe pas një incidenti të vitit të kaluar, kur një përleshje mes dy të dënuarve në Bardovc përfundoi me vdekjen e njërit prej tyre.
