Mbi 85.5 milionë euro do të investohen për rikonstruksionin dhe rritjen e efikasitetit energjetik të 9 konvikteve studentore, një konvikti për nxënës dhe 6 shkollave me qendra burimore për nxënës me nevoja të veçanta.
Projekti, i mbështetur nga BE-ja, KfW dhe Ministria e Arsimit, synon të përmirësojë kushtet për mbi 5 mijë nxënës e studentë dhe do të realizohet në tri faza.
Faza e parë përfshin konviktet “Stiv Naumov” dhe “Kuzman Josifovski-Pitu” në Shkup. Punimet parashikojnë rinovimin e sistemeve të ngrohjes, instalimeve elektrike e sanitare, masave të sigurisë dhe hapësirave të përbashkëta.
Nga fondet totale, 60 milionë euro janë kredi të KfW-së, 21 milionë grante të BE-së dhe 3.85 milionë euro nga Ministria e Arsimit.
Projekti pritet të përfundojë deri në dhjetor 2031, ndërsa me fonde shtesë investimi mund të kalojë 100 milionë euro.
