Presidenti amerikan Donald Trump po përballet me vështirësi të dukshme në sondazhet para zgjedhjeve të mes-mandatit në Shtetet e Bashkuara.
Konflikti në Iran dhe rritja e çmimeve kanë përkeqësuar perceptimin e qytetarëve për drejtimin e vendit, duke zbehur premtimet e tij për një “epokë të re të artë” dhe paqe. Çmimet e larta të karburanteve e ushqimeve, të kombinuara me rënie të lehta të pagave, po godasin veçanërisht zonat rurale, të cilat tradicionalisht mbështesin Partinë Republikane. Po ashtu, mungesa e punëtorëve për prodhimin bujqësor dhe ulja e blerjeve kineze për produkte si soja dhe drithërat kanë shtuar presionin ekonomik.
Për republikanët, situata duket e rrezikshme: sondazhet parashikojnë që Demokratët do rikthejnë shumicën në Dhomën e Përfaqësuesve dhe madje të sfidojnë shumicën në Senat. Megjithatë, Trump nuk po qëndron pasiv. Shtëpia e Bardhë po ndërmerr hapa për të ndikuar rezultatin e zgjedhjeve, duke përfshirë ridizenjimin e distrikteve elektorale për të favorizuar të djathtën (gerrymandering), ndryshimin e rregullave të votimit dhe, në mënyrë potenciale, prezencën e agjentëve të ICE pranë qendrave të votimit.
Gerrymandering është një praktikë e vjetër politike që i jep avantazh partisë në pushtet. Këtë herë, republikanët kanë vepruar pa pretendime demografike, duke siguruar disa vende të sigurta në Teksas dhe duke u përhapur në shtete të tjera jugore falë vendimeve të favorshme të Gjykatës Supreme, duke përfshirë dobësimin e Voting Rights Act, që mbron votën e minoriteteve. Përpjekjet e demokratëve për të përmirësuar rregullimin në Virginia janë bllokuar, duke lënë pak mundësi për ndërhyrje në favor të tyre.
Ndërkohë, Trump ka një fond të jashtëzakonshëm zgjedhor prej 350 milionë dollarësh dhe po përpiqet të ndryshojë rregullat e votimit përmes ligjit “Save America Act”, por përballë pengesave kushtetuese dhe një Senati që nuk ka dy të tretat e nevojshme për ndryshime të tilla, suksesi i plotë është i vështirë. Shtëpia e Bardhë po kërkon rrugë alternative për të futur këto masa në ligje me karakter ekonomik, duke e bërë betejën zgjedhore më komplekse dhe dinamike.
Ndërsa Demokratët mbeten favoritet për zgjedhjet e mes-mandatit presidencial, veprimet agresive të administratës Trump dhe manipulimet e distrikteve mund të ndryshojnë rezultatin në disa vende kyçe, duke pasur pasiguri të mëdha për atë se çfarë do ndodhë deri më 3 nëntor.
Analizë nga Massimo Gaggi, Corriere della Sera
/tvklan.al
