Kryeministri në detyrë, Albin Kurti, e ka cilësuar fitore të Republikës së Kosovës përballë grupeve terroriste serbo-ruse rindërtimin e shpejtë të kanalit të Ibër-Lepencit pas sulmit vitin e shkuar.
Sot u bë një vit që kur me 20 kilogramë eksplozivë është shpërthyer kanali i ujit në Ibër-Lepenc. Për këtë sulm hetimet edhe po vazhdojnë, si nga autoritetet vendore ashtu edhe ato ndërkombëtare. Në FBI thanë se informacione duhet kërkuar tek institucionet e Kosovës, por në Prokurorinë Speciale refuzuan të ofrojnë detaje.
E Kurti, në një shkrim në Facebook, ka thënë se ekzistojnë dëshmi të qarta për përfshirjen e grupeve terroriste serbo-ruse, që financohen në Beograd.
“Në afat rekord prej vetëm një muaji akuadukti i dëmtuar u rindërtua, rrjedha e ujit bashkë me sistemin u rikthyen në kapacitete të plota operative. Përgjigjja jonë dëshmoi aftësinë e lartë reaguese të ndërmarrjeve publike dhe institucioneve shtetërore. Shteti dhe Republika triumfuan përsëri përballë grupeve ekstremiste dhe terroriste që mbështetjen e financimin e gjejnë te Beogradi zyrtar, e inspirimin dhe metodat i gjejnë te Rusia – sulmi ndaj infrastrukturës kritike në Ibër Lepenc i ngjasonte sulmeve ruse ndaj rrjetit energjetik të Ukrainës”, ka shkruar ai. “Pas bastisjeve në veri të Kosovës, në lidhje me këtë sulm, ishin konfiskuar armë, uniforma dhe pajisje të ndryshme, si dhe ishin gjetur emblema ruse dhe serbe të strukturave të inteligjencës, ushtrisë dhe sigurisë. Edhe sot, ato janë dëshmi të qarta për përfshirjen e grupeve ekstremiste dhe terroriste serbo-ruse, me lidhje të forta në Serbi, që synim e kanë destabilizimin e vendit tonë dhe krijimin e një mjedisi të pasigurt në rajon”.
