NATO po organizon në Norvegji stërvitjen më të madhe ushtarake në 30 vitet e fundit. NATO thotë se stërvitja nuk ka lidhje me pushtimin e Ukrainës nga Rusia, pasi ishte programuar për vitin e kaluar, por u shty për shkak të pandemisë. Madje aleanca kishte ftuar edhe vëzhgues nga Rusia për të ndjekur stërvitjen, por Moska refuzoi. “Cold Response 2022” (Reagimi/Përgjigja e Ftohtë 2022) po bashkon aleatët nga Europa dhe Amerika e Veriut, duke demonstruar lidhjen e qëndrueshme transatlantike në zemër të NATO-s. Në stërvitjen e quajtur “Përgjigja e Ftohtë” marrin pjesë 30 mijë trupa, 50 anije luftarake dhe 200 avionë luftarakë. Ajo po zhvillohet 200 kilometra larg kufirit me Rusinë.
“Forcat aleate duhet të jenë të gatshme për të operuar në çdo mjedis në çdo kusht. Trajnimi në Norvegji i lejon aleatët dhe partnerët e NATO-s të praktikojnë aftësitë e tyre duke vepruar në mjedise ekstreme dhe të ashpra, nga fjordet e ngrira deri te detet e dridhura e deri te malet e mbuluara me akull. Ka një arsye që Norvegjia pret Qendrën e Përsosmërisë së NATO-s për Operacionet e Motit të Ftohtë! Por shumë aleatë të tjerë të NATO-s organizojnë stërvitje dhe ndihmojnë gjithashtu në zhvillimin e kësaj ekspertize, nga Baltiku i ftohtë në plazhet e largëta vullkanike të Islandës deri në Arktikun e Lartë Kanadez”, njofton NATO.
