Ministri i Jashtëm turk Hakan Fidan do t’u tregojë ministrave të jashtëm të NATO-s këtë javë se samiti i ardhshëm i liderëve të NATO-s, i caktuar për në Ankara në korrik, duhet të riafirmojë unitetin dhe integritetin e aleancës.
Kështu tha të mërkurën për Reuters një burim i ministrisë së jashtme, transmeton Klankosova.tv.
Fidan do të marrë pjesë në një takim të ministrave të jashtëm të NATO-s të enjten dhe të premten në Helsingborg të Suedisë.
Turqia do të jetë nikoqir i samitit të ardhshëm të liderëve të NATO-s në Ankara më 7-8 korrik.
Gjatë takimit të ministrave të jashtëm të NATO-s, Fidan do të ndajë pritjet e Turqisë në lidhje me samitin e Ankarasë dhe do t’u informojë vendeve aleate mbi përpjekjet e Turqisë për të siguruar që ai të shërbejë si një ngjarje e nivelit të lartë që riafirmon unitetin dhe integritetin e NATO-s, tha burimi.
Fidan gjithashtu do të japë informacion mbi kontributet e Turqisë në NATO dhe do të nxjerrë në pah “praktikat më të mira të Turqisë në lidhje me konvertimin e shpenzimeve të mbrojtjes në aftësi”.
Fidan do të theksojë nevojën për të zhvilluar bashkëpunimin transatlantik në industrinë e mbrojtjes brenda NATO-s pa asnjë kufizim.
Një burim i veçantë diplomatik turk tha se anëtarët e Iniciativës së Bashkëpunimit të Stambollit (ICI), një forum partneriteti me disa vende të Lindjes së Mesme, si dhe Japonia, Zelanda e Re, Koreja e Jugut dhe Australia – të njohura si Katërshja Indo-Paqësore – mund të ftohen në samitin e Ankarasë në nivel ministrash të jashtëm.
Burimi tha se të gjithë aleatët e NATO-s do të bien dakord në ditët në vijim për të ftuarit në samit dhe çështja mund të diskutohet në takimin në Suedi.
