Mbrëmë, treni urban që qarkullon në relacionin Zelenikovë – Shkup u përball me probleme serioze, pasi për shkak të ndërprerjes së furnizimit me energji elektrike mbeti i bllokuar para stacionit hekurudhor në lagjen Lisiçe.
Treni, i cili sipas orarit ishte nisur nga Zelenikova në ora 20:12, papritur mbeti pa energji elektrike dhe u bë plotësisht i paaftë për të lëvizur – as përpara dhe as prapa. Për rreth gjysmë ore, kompozicioni qëndroi i bllokuar në shina.
Pasagjerët që ndodheshin brenda kanë dëshmuar për përvojën e pakëndshme, duke theksuar se nuk kishin mundësi ta braktisnin trenin në mënyrë të sigurt. Treni kishte ndaluar në një terren të paarritshëm, shumë larg stacioneve më të afërta, duke i detyruar qytetarët të prisnin brenda derisa defekti të zgjidhej.
Pasi furnizimi me energji elektrike filloi gradualisht të normalizohej, treni më në fund u nis, por lëvizte me shpejtësi të reduktuar.
Në vend të 25 minutave, sa zgjat zakonisht udhëtimi deri në kryeqytet, pasagjerët e shqetësuar arritën në destinacionin përfundimtar me 40 minuta vonesë.
Ky është një nga defektet e para më të mëdha të lidhura me trenin urban, i cili shkaktoi reagime të shumta dhe pakënaqësi te pasagjerët që e përdorin këtë formë të transportit publik.
