Presidenti Hashim Thaçi tha se dje në Samitin e Zagrebit ka kërkuar heqjen e menjëhershme të vizave për qytetarët e Kosovës dhe se ka kërkuar që Kosovën ta njohin edhe pesë shtetet anëtare të BE-së, të cilët edhe i fajësojë për vonesën e liberalizimit të vizave.
Thaçi tha se gjithashtu i ka falënderuar shtetet e BE-së për ndihmën dërguar Kosovës për luftimin e pandemisë.
“Kam theksuar se Kosova si vendi më pro europian në rajon meriton trajtimin më të shpejtë, më të përgjegjshëm dhe më vendimmarrës nga BE, në veçanti sa i përket meritës për vendimin e menjëhershëm për liberalizimin e vizave për Kosovën. Kjo vonesë po e zbeh besimin në vendimmarrjen e Brukselit. Shtetet anëtare të BE-së duhet të lëvizin përpara më shpejt dhe me urgjencë”.
“Kosova padrejtësisht po mbahet e izoluar, për shkak të mosunitetit pasi që ka përmbushur të gjitha kriteret. Kjo lidhet me mosnjohjen e pesë vendeve të BE-së, gjë që dje qartë në prezantimin tim thashë që edhe këto pesë vende ta njohin shtetin e pavarur dhe sovran të Kosovës”.
Thaçi tha se BE nuk duhet t’i shmanget politikës së zgjerimit me shtetet e Ballkanit Perëndimor.
“Të gjithë duhet të punojnë për rikthimin e besimit europian në Ballkanin Perëndimor. Po ashtu, për Kosovën është e rëndësishme që të kemi një angazhim më konkret të BE-së duke u trajtuar si vend i pavarur dhe sovran”.
