Qeveria në detyrë e Kosovës ka humbur legjitimitetin dhe për këtë qëllim duhet të formohet qeveria e re. Zgjedhje të reja nuk mund të ketë këtë vit, andaj qeveria e re e udhëhequr nga LDK-ja do të jetësohet javën e parë të muajt maj.
Kështu po vlerëson politologu Ramush Tahiri, i cili në një intervistë për KosovaPress, ka folur për zhvillimet politike që pritet të ndodhin në javët në vazhdim.
Ai deklaron se qeveria në detyrë ka humbur besimin e Kuvendit, por edhe legjitimitetin për të çuar përpara proceset. Andaj thotë se ka ardhur koha që të zëvendësohet me një qeveri të re.
“Ne kemi qeveri e cila ka humbur besimin e Kuvendit dhe një qeveri e cila është e shkarkuar me 2/3 e votave. Pra kemi qeveri e cila nuk ka mandat dhe kemi qeveri e cila duhet të ndërrohet me një qeveri t ë re. Me Kushtetutën e Republikës së Kosovës, Presidenti është ai i cili e përcakton se a duhet vendi të shkojë në zgjedhje të reja apo duhet të ketë qeveri të re. Kushtetuta i parasheh që të dy mundësitë ndërsa presidenti është institucioni i cili vendos. Presidenti nuk vendos në diskrecionin e tij të lirë por në diskrecionin institucional, që nënkupton që presidenti është i obliguar t’i konsultoi të gjitha partitë politike dhe varësisht prej dëshirave të tyre, dhe qëndrimeve të tyre të vendosë”, thotë ai.
Politologu Tahiri thotë se përderisa të gjitha partitë, përpos Vetëvendosjes janë dakorduar për të formuar qeveri pa zgjedhje, kjo edhe duhet të ndodh dhe se ajo parti që dëshmon që i ka numrat duhet ta formojë qeverinë e ardhshme.
“E vetmja është Lëvizja Vetëvendosje e cila kërkon që vendi të shkojë në zgjedhje. Nuk është në mandatin e VV-së, as të qeverisë, as ta caktojë afatin e zgjedhjeve, e as të caktojë mandatin deri kur do kjo qeveri të rrijë në pushtet. Sepse kjo qeveri faktikisht, formalisht është rrëzuar nga pushteti me 82 deputetë dhe tash mandatari i ri duhet të dorëzojë kabinetin e tij të ministrave për votim në kuvend dhe kuvend duhet me votë të deklarohet. Nëse Kuvendi me 61 vota e voton një qeveri që do të krijohet nga LDK-ja, AAK-ja, Nisma Socialdemokrate, nga AKR-ja, minoritetet dhe Lista Serbe, e që gjithsej bëjnë 66 deputetë, atëherë ne kemi qeveri të zgjedhur”, thotë ai.
Tahiri thotë se tash si është gjendja nuk do të mund të ketë zgjedhje të reja, jo vetëm për shkak të koronavirusit dhe pandemisë, por për shkak se shumica e partive politike janë deklaruar se nuk duan zgjedhje.
Ai shprehet i bindur se qeveria e re do të formohet hiç më larg se fillimi i muajt maj.
“Qeveria e re do të jetë më së largu 25 ditë nga dita e sotme. Sepse kalon afati kushtetues. Presidenti ka 10 ditë dhe mandatari i ka 15 ditë për t’u votuar në Kuvend. Do të thotë në fillim të majit nëse jo më shumë ne do të kemi votimin e qeverisë së re dhe të urojmë që kjo qeveri të zgjidhet. Zgjedhjet mbahen për parlament nuk mbahen për qeveri. Qeveria nuk e merr mandatin nga populli, por e merr nga Kuvendi. Ndërsa Kuvendi e merr mandatin nga populli. Dhe përderisa ka mandat kuvendi, mund të ndërrohen gjatë këtij mandati 4 vjeçar disa qeveri”, thotë ai./Kosovapress/
