Sot do të dorëzohen padi të reja kundër kriminelëve serbë nga qytetarët e Gjakovës dhe të Rahovecit.
Përfaqësuesit nga Shoqata për Krime Lufte “Gjakova 98-99” do të dorëzojë kontigjentin e 14 të padive ( 100 padi ) kundër kriminelëve serbë.
Këto padi do të dorëzohen në Policinë e Kosovës, Departamenti i Krimeve të Luftës në orën 10:00, njofton Klan Kosova.
Kësaj radhe shoqata paralajmëron se do të dorëzohen shtesë edhe këto dosje:
1. Dosjet lidhur me krimet e datës 7,8,9,10 Maj 1999, ku janë të ekzekutuar dhe masakruar 97 persona, si dhe të arrestuar gjatë kësaj periudhe, një numër i madh i qytetarëve të Komunës së Gjakovës ( 247), ku më pas disa janë liruar dhe të tjerët janë mbajtur peng. Në këtë dosje do të dorëzohen edhe formularët e përgatitur të personave të vrarë në Burgun e Dubravës.
2. Dosja e 112 fëmijëve të vrarë në Komunën e Gjakovës gjatë periudhës 1998-1999.
3. Dosja e kriminelëve pjesëmarrës të datave 7,8,9 dhe 10 Maj 1999 dhe atyre që kishin bartur kufomat duke i varrosur dhe zhvarrosur me urdhrat e urdhërdhënësve kriminalë serbë.
Po ashtu, dje ka dalë në shtyp edhe libri i 112 fëmijëve të vrarë në komunën e Gjakovës gjatë periudhës 1998-1999 e autores, Shkëndije Hoda.
