Ministri i Shëndetësisë Azir Aliu njoftoi sot në një konferencë për shtyp rezultatet e një komisioni të huaj që analizoi dyshimet për ndërhyrje të mundshme të panevojshme kardiake dhe kardiokirurgjikale në spitalet private, të kryera për përfitim financiar, transmeton Portalb.mk.
Sipas Aliut, u analizuan gjithsej 13 raste.
“Nga gjithsej 13 raste të analizuara, që lidheshin me dyshime për operacione të panevojshme ose referime të panevojshme për kirurgji, komisioni i huaj arriti në përfundimin se te katër pacientë trajtimi i ofruar ishte përgjithësisht i përshtatshëm nga ana mjekësore, në kohë dhe në përputhje me standardet e pranuara të praktikës klinike”, tha Aliu.
Megjithatë, në nëntë rastet e mbetura, sipas ministrit, ekspertët e huaj identifikuan gjetje të dyshimta në dokumentacion dhe vlerësim diagnostik.
“Te nëntë pacientët e mbetur, sipas ekspertëve të huaj, dokumentacioni tregon gjetje të dyshimta gjatë vlerësimit diagnostik, për shembull, mospërputhje midis gjetjeve angiografike nga angiografia koronare dhe raportit me shkrim, gjë që rezultoi në një indikacion të papërshtatshëm për procedurat, qofshin ato endovaskulare apo kirurgjikale”, tha ministri Aliu.
Si shembull, tha Aliu, u treguan mospërputhje midis gjetjeve angiografike nga angiografia koronare dhe raporteve me shkrim, të cilat rezultuan në indikacione të papërshtatshme për procedura endovaskulare ose kirurgjikale. Ai njoftoi se rastet do t’i paraqiten Qeverisë, si dhe Prokurorisë Publike dhe institucioneve të tjera kompetente.
Këto janë raste nga disa klinika dhe spitale private dhe shtetërore në vend. Rasti u hap fillimisht nga kardiologu Sashko Kedev, i cili disa muaj më parë vuri në dukje publikisht “parregullsi të mundshme në disa nga trajtimet dhe ndërhyrjet”.
Pas kësaj Ministria e Shëndetësisë formoi Komisionin e Brendshëm të përbërë nga ekspertë mjekësorë, juristë dhe ekonomistë, si dhe një Komision të jashtëm.
