Blinken dhe Jean-Yves Le Drian koordinojnë veprimet
SHBA dhe Franca e cila mban presidencën e BE-së kanë vendosur që të vijojnë lobimin e përbashkët në mënyrë që deri në Qershor të bëhet e mundur hapja e negociatave me Tiranën dhe Shkupin. Sekretari amerikan i shtetit Anthony Blinken dhe homologu i tij francez Yves Le Drian diskutuan për forcimin e mbështetjes për Maqedoninë e Veriut dhe Shqipërinë në rrugën e tyre të anëtarësimit në Bashkimin Europian.
Ky proces është bllokuar nga Bullgaria dhe ka pak gjasa të vijojë për shkak të vetos. Para mbajtjes së konferences së parë ndërqeveritare me BE-në gjithsesi duhet miratuar korniza negociatore ku janë përfshirë kushte të tjera për Tiranën dhe Shkupin.
Në Bruksel janë të gjithë të zhgënjyer, por ministrja e Jashtme Teodora Genchovska këmbëngul se Bullgaria mund të heqë veton, pas ndryshimeve në kushtetutën e Maqedonisë ku bullgarët të përfshihen si popull shtetformues edhe pse së fundmi rezultuan vetëm 3500 shtetas të tillë.
Ky vendim për ndryshimin e kushtetutës maqedonase do të kërkonte dy të tretat e votave në Shkup, gjë që duket e vështirë për qeverinë e Kovaçevskit.
Edhe në Bullgari ka mosmarrëveshje mes katër partive që mbajnë në këmbë qeverinë e Kiril Petkov që kanë kërcënuar se do të largoheshin nga koalicioni nëse Bullgaria heq veton e saj përpara se të plotësoheshin të gjitha kushtet e vendosura në parlament.
Klan News
