Ekipet e shpëtimit, të cilët kanë gjurmuar nën gërmadhat në Bejrut pas shpërthimit të fuqishëm muajin e kaluar, pohojnë se më nuk ka shenja jete dhe se më askush nuk mund të shpëtohet.
Një aparat me sensorë ka zbuluar shenja të mundshme të jetës të enjten, por ekipet e shpëtimit nuk e kanë gjetur burimin, pasi kanë larguar 95 për qind nga gërmadhat, shkruan Bi-Bi-Si.
Rreth 50 vullnetarë, duke përfshirë edhe një ekip nga Kili, kanë punuar në lokacionin.
Pasi aparati ka zbuluar shenja potenciale të jetës, njerëzit janë tubuar, duke pritur se do të ndodh mrekulli dhe të gjendet ndonjë i mbijetuar. Sinjali ka ardhur nga thellësia prej tre metrave.
Përpjekjet e ekipeve të shpëtimit tani do të orientohen ndaj gjetjes së trupave të viktimave.
Bejruti u shkatërrua nga një shpërthim prej 2.700 tonë amonium nitrat në gusht.
Nga shpërthimi jetën e kanë humbur rreth 190 persona, ndërsa rreth 6.000 janë lënduar.
