PËR TË PASUR SUKSES LIPSET MBËSHTETJE FINANCIARE
Në një raport mbi bashkëpunimin në luftën kundër krimit të organizuar në Ballkanin Perëndimor, eurodeputetët u kërkuan qeverive në rajon të rrisin përpjekjet e tyre për avancuar me reformat në fushën e sundimit të ligjit dhe luftës kundër korrupsionit dhe krimit të organizuar. BE-ja, sipas eurodeputetëve, duhet t’i mbështesë këto përpjekje përmes ndihmës financiare dhe bashkëpunimit praktik.
Në raportin e miratuar të martën nga Komiteti i Punëve të Jashtme thuhet see vendet e Ballkanit Perëndimor janë vendet e origjinës, destinacionit dhe tranzitit për trafikimin e qenieve njerëzore.
Rajoni shërben si një korridor tranziti për emigrantët dhe refugjatët, si dhe vend i pastrimit të parave dhe trafikut të armëve të zjarrit.
Megjithatë, eurodeputetët theksojnë se lufta kundër krimit të organizuar dhe integrimi në BE janë procese reciproke përforcuese, duke i kërkuar BE-së të përshpejtojë procesin e integrimit. Faktorët kryesorë që i bëjnë shoqëritë e Ballkanit Perëndimor të prekshme, thotë raporti, janë mungesa e mundësive të punësimit, korrupsioni, dezinformimi, elementët e kapjes së shtetit, pabarazia dhe ndërhyrja e huaj nga regjimet jodemokratike si Rusia dhe Kina.
Në këtë kontekst, pasi izolimi inkurajon aktivitetet kriminale, eurodeputetët gjithashtu i bëjnë thirrje Këshillit që të miratojë liberalizimin e vizave për Kosovën pa vonesa të mëtejshme. Në të njëjtën kohë, duke e konsideruar si mungesë vullneti politik për të luftuar krimin e organizuar, eurodepuetët duan që vendet e Ballkanit Perëndimor të adresojnë plotësisht mangësitë e sistemeve të tyre të drejtësisë, duke përfshirë kohëzgjatjen e procedurave ligjore.
Gjithashtu, dokumenti i miratuar nënvizon nevojën për të çrrënjosur lidhjet politike dhe administrative me krimin e organizuar përmes masave të qarta mbrojtëse kundër korrupsionit dhe ndjekjes efektive të rasteve të korrupsionit të profilit të lartë./Klan Macedonia/