Gjatë ditës së djeshme, deputetët e Kuvendit të Kosovës, kanë mbajtur seancën për miratimin e ligjit për buxhetin e vitit 2020.
Vetëm në orët e para të mëngjesit të ditës së sotme, deputetët e Kuvendit arritën që ta votojnë atë.
E për votimin e ligjit për buxhetin për vitin 2020, kryeministri i Kosovës, Albin Kurti, ka falënderuar publikisht deputetët të cilët edhe pse në gjendje jo të mirë shëndetësore, qëndruan në sallë për orë të tëra dhe e votuan buxhetin.
Ai po ashtu ka falënderuar edhe kryetaren e Kuvendit të Kosovës, Vjosa Osmanin, për organizimin.
Postimi i plotë i Kurtit pa ndërhyrje:
Dy falënderime
Qëndrimi i deputetëve për mbi dhjetë orë në Kuvend për ta miratuar ligjin për buxhetin 2020 dëshmoi përgjegjësi të lartë përballë situatës së pandemisë që ka prekur tashmë sidomos kontinentin tonë.
I falënderoj deputetët e LDK-së, ata të pakicave dhe të VETËVENDOSJE!-s, për përkushtimin dhe mbështetjen.
Në veçanti, i falënderoj deputetët me probleme shëndetësore, prej z. Fetah Rudit në karrocë invalidore e deri te z. Hatim Baxhaku i operuar në zemër para vetëm një muaji e gjysmë.
Organizimi dhe mbarëvajtja e mbledhjes së djeshme të jashtëzakonshme nga Kryetarja e Kuvendit, znj. Vjosa Osmani, ishte i jashtëzakonshëm.
Nga kontrolli mjekësor në hyrje të sallës gjer te ndjekja e përpiktë e hollësive procedurale.
Ishte kjo një ditë e gjatë me sukses të plotë.
Miratimi i buxhetit vjetor është ndër hapat më të rëndësishëm për të përballuar sfidat aktuale, e për të zbatuar programin e qeverisë së ndryshimit. Të falemnderit Kryeparlamentare.