Policia ka evidentuar 10.411 shkelje nga drejtues të trotinetëve elektrikë, biçikletave, mopedëve dhe motoçikletave gjatë periudhës maj–gusht 2026. Vetëm për mosmbajtjen e helmetës janë shqiptuar mbi 7.300 masa.
Gjatë kontrolleve të intensifikuara në komunikacion, në periudhën nga maji deri në gusht të vitit 2026, policia ka konstatuar gjithsej 10.411 shkelje të rregullave të trafikut.
Prej tyre, 1.571 shkelje kanë të bëjnë me drejtues të trotinetëve elektrikë, 34 me biçiklistë, ndërsa 8.806 shkelje janë regjistruar te drejtuesit e mopedëve, motoçikletave dhe triçikletave.
Numri më i madh i shkeljeve lidhet me mosmbajtjen e helmetës mbrojtëse. Për këtë shkelje janë regjistruar gjithsej 7.303 raste.
Policia ka konstatuar gjithashtu 718 shkelje për lëvizje në sipërfaqe të papërshtatshme, 401 raste të drejtimit të mjeteve të paregjistruara dhe/ose pa policë sigurimi, si dhe 322 raste të mosmbajtjes së jelekut reflektues.
Janë evidentuar edhe 81 raste ku mjetet janë drejtuar nga persona nën moshën 18 vjeç, 45 raste të drejtimit nën ndikimin e alkoolit, si dhe 1.541 shkelje të tjera.
619 vepra penale dhe 423 mjete të sekuestruara
Përveç kundërvajtjeve, gjatë kontrolleve policore janë zbuluar edhe 619 vepra penale.
Prej tyre, 604 raste kanë të bëjnë me drejtimin e mjetit pa leje drejtimi, 14 me drejtimin nën ndikimin e alkoolit, ndërsa një rast lidhet me drejtimin e mjetit në kah të ndaluar.
Gjatë aksioneve janë sekuestruar gjithsej 423 mjete, prej të cilave 20 trotinetë elektrikë dhe 403 mopedë, motoçikleta dhe triçikleta.
Ministria e Punëve të Brendshme u ka bërë thirrje drejtuesve që të respektojnë rregullat e komunikacionit dhe të përdorin pajisjet e përcaktuara mbrojtëse.
“Apelojmë te të gjithë drejtuesit që t’i respektojnë rregullat e komunikacionit, të përdorin pajisjet e përcaktuara mbrojtëse, të mos drejtojnë mjete nën ndikimin e alkoolit dhe të mos drejtojnë automjete pa i përmbushur kushtet ligjore. Në veçanti bëjmë thirrje për kujdes dhe përgjegjësi ndaj këmbësorëve dhe pjesëmarrësve të tjerë në komunikacion”, thuhet në apelin e MPB-së.
Ministria e Punëve të Brendshme njofton se do të vazhdojë me kontrollet e intensifikuara në komunikacion, me theks të veçantë te shkeljet dhe sjelljet që rrezikojnë sigurinë e pjesëmarrësve në trafik.
Sipas MPB-së, qëllimi i kontrolleve është zbulimi dhe sanksionimi në kohë i shkeljeve, parandalimi i aksidenteve dhe mbrojtja e jetës së qytetarëve.
