Presidentja e Kosovës, Vjosa Osmani, në kuadër të vizitës zyrtare në New York, ka takuar homologun nga Hondurasi, Juan Orlando Hernández Alvarado.
Siç njofton Presidenca, marrëdhëniet ndërmjet të dy vendeve janë cilësuar të shkëlqyeshme, teksa të dy presidentët kanë shfaqur gatishmërinë për thellimin e tyre, njofton Klan Kosova.
Osmani ka theksuar se te Hondurasi e shohin partnerin për lobim te shtetet fqinje në Amerikën Qendore dhe atë Jugore për ta njohur pavarësinë e Kosovës.
Sipas saj, nga Hondurasi pritet mbështetje edhe në procesin e anëtarësimit në organizata ndërkombëtare. Teksa ka folur për gjendjen e përgjithshme në vend, Osmani ka theksuar se procesi i dialogut me Serbinë duhet përfundojë me njohje të ndërsjellë në kufijtë aktualë dhe me rendin juridik aktual.
Të dy presidentët u pajtuan që çështja e ndryshimeve klimatike dhe pasojat e saj duhet të bëhen prioritet i agjendës globale.
