Një avion luftarak F-16 i Forcave Ajrore të Ukrainës ka shënuar fitoren e parë në një përballje ajër-ajër, duke rrëzuar një avion luftarak rus, konfirmoi kryetari i Shefave të Shtabit të Përbashkët të Shteteve të Bashkuara, gjenerali Dan Caine, gjatë një seance dëgjimore në Senatin amerikan.
“Së fundmi pamë përballjen e parë ajër-ajër, në të cilën një F-16 ukrainas rrëzoi një avion luftarak rus”, deklaroi Caine.
Gjenerali amerikan nuk bëri të ditur llojin e avionit rus, vendin apo datën e saktë të incidentit, por e lidhi këtë sukses me forcimin e sistemit të mbrojtjes ajrore të Ukrainës.
“Gjatë viteve të fundit, me mbështetjen e shumë partnerëve, Ukraina ka forcuar ndjeshëm sistemin e saj të mbrojtjes ajrore me disa shtresa”, tha ai.
Sipas portalit ukrainas Militarnyi, avioni i rrëzuar besohet të ketë qenë një Su-35 rus, i humbur më 8 korrik 2026.
Në atë kohë, kanale ruse në Telegram që mbështesin luftën pranuan humbjen e avionit, duke pohuar se ai ishte rrëzuar si rezultat i veprimeve të Forcave të Armatosura të Ukrainës. Sipas raportimeve, piloti arriti të mbijetojë dhe u shpëtua.
Më vonë, media pranë Kremlinit pretenduan se avioni ishte goditur nga një sistem amerikan Patriot, pasi ishte shpërqendruar gjatë një përballjeje me avionë ukrainas. Megjithatë, nuk u paraqitën prova që mbështesnin këtë version.
Ky zhvillim shënon një fazë të re në përdorimin e avionëve F-16 nga Ukraina. Deri tani, këta avionë ishin angazhuar kryesisht në interceptimin e raketave dhe dronëve rusë, si edhe në goditje precize ndaj objektivave tokësore.
Ukraina pritet të marrë rreth 100 avionë F-16, të dhuruar kryesisht nga Norvegjia, Belgjika, Danimarka dhe Holanda.
