Ministria e Vetëqeverisjes Lokale, në kuadër të reagimit të koordinuar institucional ndaj krizës së furnizimit me ujë, ka siguruar urgjentisht një donacion prej 50.000 litrash ujë të pijshëm për banorët e Komunës së Gostivarit.
Sot në Gostivar ka mbërritur kamioni i parë nga dy të planifikuar, me sasitë e para të ujit falas. Shpërndarja synon të plotësojë drejtpërdrejt nevojat bazë të popullatës gjatë kohës që zgjasin masat dhe rekomandimet e shërbimeve kompetente.
Ministria mbetet në koordinim të vazhdueshëm me të gjitha institucionet relevante dhe po e ndjek me kujdes situatën në terren.
“Kur qytetarët përballen me sfida serioze, reagojmë shpejt, me përgjegjësi dhe solidaritet. Me këtë donacion japim një kontribut konkret në tejkalimin e gjendjes dhe dërgojmë një mesazh të qartë: institucionet janë krah për krah me qytetarët sa herë që është e nevojshme”, deklaroi ministri i Vetëqeverisjes Lokale, Ivan Stoilkovik.
Me këtë veprim të shpejtë dhe konkret, Ministria e Vetëqeverisjes Lokale edhe një herë e konfirmon rolin e saj si partner i sigurt i të gjitha komunave – e gatshme, në kohë dhe me vendosmëri të reagojë përmes mbështetjes institucionale dhe angazhimit të drejtpërdrejtë në tejkalimin e çdo sfide të jashtëzakonshme. përcjell Zhurnal.mk .
